Aldıñğı on şaqtı jıl işinde talay hikimet jaylar kezikti ğoy. Sonıñ işinde ärbir adamdı jeke – jeke tarazığa salıp, şekesinen şertip körip, ärkimniñ öz boyına şaq ädil bağa bergeni de bir qızıq boldı. Endi bir ğajabı, öle – ölgenşe öşpeytin osı tañbanı adamdardıñ etine ğana emes, süyegine de siñirip, on eki müşesin daralap atap otırıp, eñ layıqtı degen jerine battita däldep ürdı: Bireudiñ keudesine jauız, endi bireudiñ auzına suayt, tağı bireudiñ böksesine jağımpaz, tağı bir tobınıñ mañdayına adal, qaysar dep bastı. Äsirese, qazir zaman tüzelip, el tınıştalğannan keyin, är adamnıñ el kökireginde jattalğan osı bağası, tipti äşkere, aşıq aytılatın da boldı. Osı qatarda men de öz salmağımdı bayqap jürmin. Wlı kärilerdiñ alğıs, alqauınan, ortadağı bedelimnen, zamandastarımnıñ qwrmet, iltipatınan da özimniñ aldıñğı qatardağı azamat ekenimdi añğarıp kelemin. Al keybireuler ebin tauıp, köz aldımda da köpirte madaqtaytın bolıp jür. Öytkeni auır jıldardıñ sınağı meni eñ soñğı topqa jatqızsa kerek. Bwğan özim de mäzbin. Keyde iştey osınımdı maqtanış etetin sätterim de bar. Biraq, osınday özime özim ğana emes, qarayğan halıq riza bolğan mıqtılığımdı oylağan kezderimde eñ aldımen anam esime tüsedi. “Anamnıñ aq sütiniñ näri ğoy bwl” dep eljireymin. Ua, anaşım sonau baldırğan bala şağımda, qwjır – qwjır qwz jartastarı üñilip twratın qıstaudağı tas üyde, ıñ – şıñsız oñaşa qısqı keşte bauırıña tığılıp otırıp tıñdaytın ertegilerim äli esimde: Alıp qara qws bäyterektiñ basındağı balapandarın sağınıp, zulap kele jatadı. Ekpininen dauıl twradı. Balalarım aydahardıñ auzınan aman ba eken degende tögilgen köz jası jauın bolıp sirkirep ötedi. Asığıp, añsap kelip wyasına qonadı. Bäyterek jeti ret mayısıp, jeti ret tüzeledi. Balapandarın aman – esen körip şeksiz quanışqa bölenedi. Bauırına basıp süyedi. Kenet adam isin sezedi. Balapandarıma qastıq istegeli kelgen bir jädigöy bolmasın dep qorqadı. “adam iisi qaydan şığadı?” dep swraydı. Balapandarı aytpaydı. Aşulanğan alıp qara qws temir tegeurinimen ayamay şeñgeldep, olardı orındarınan jwlıp – jwlıp aladı…Qws bolsa da ana ğoy! Meşkey ana!…

Basıma qara bwlt töngen kezde, alıp qanatınıñ astına alıp, adam qatarına qosqan da sol anam edi – au!

Bwl bir qızıq äñgime.

İstiñ bası bılay boldı. Jañılmasam däl 1967 jılı tamız ayınıñ 19 jwldızı edi. Bizdiñ kommunada kapitalizm jolımen jürgen wqıqtılar men tört salalı elementterdiñ sağın sındırıp, sazayın tartqızu zor qimılı jürgizildi. “tüu” degen tükirigi jerge tüspey twrğan qızıl jeñ belgili batırlar bir kün bwrın jiın aşıp, adam tizimdepti. Erteñinde sol tizim boyınşa, kommuna partkomınıñ sekretarınan tartıp bir top adam halıq jinalğan ülken alañnıñ bir şetine qatarlap tizile bastadı. Jiın uağınan biz de keşikkenimiz joq. Öytkeni jeti kilometr jerden at bauırına alıp aydap kelgen bolatın. Bir täuiri jiınnıñ dayındığı küşti eken. Köp tostırğan joq; är kimniñ öz basına däl kelmese de, er basına qağaz säukeleden birden jetti. Betke jağatın qara siyaları da mol körinedi. Äueli moyınğa asatın qarğı taqtaylarıasıp ta qaldı. Bir adamğa ekiden “qorğauşı”da dayar eken… odan keyingisi şım – şıtırıq birdeñe: Ayaqtı twsadı ma kerek, biik üstelge şığarıp toñqalañ asırdı ma kerek, äyteuir, oyına kelgenin istedi. Qaytalanğan qaharlı wrandar şaqırılıp, bizdiñ «qwlağanımız» jariyalandı. ärbir brigadağa onan äri küreske alu tapsırığı berildi.

Sol küni keşte brigadadağı kezek mağan keldi. Bağana “säukele” kigende – aq zärem wşıp, es – aqılımnan ayırılıp qalğan edim. Äueli «säukeleniñ» keñ bolıp, şeñber temiri keñsirigimdi qajap, jaralap ketkenin de bilmeppin. Endi mine ala – köleñke zal işinde qalıñ adam ayqay – süren salıp, qıspaqqa ala bastağanda boyımda janım qalmadı; joq, janım mwrnımnıñ wşında ğana twrdı. Desede, äntek es toqtatıp, jañbırşa jauğan köp swraqqa: “joq”, “bilmeymin”, “tük te jat nietim joq”, “aynalayın köpşilik – au, öz qoldırıñda östim ğoy, mende qaydağı qılmıs, brigadirmen bir ret wrsısıp qalğannan basqa tittey künäm joq…” dep zarlay bastadım. Sol- aq mwñ eken, kömekeyi jırtılğanşa ayqay salğan bir “batırdıñ” dauısımen ilese, bütin zal şu ete tüsti de, qalıñ jwdırıq jaudı da ketti.

Bir sättik dudan keyin qaytadan swraqqa alına bastadım. Öne boyım qalşıldap, dirildep, buınım qwrıp baradı. Qorıqqandiki me, joq älde közim şwbartıp ketkendikten be, bilmeymin, äyteuir otırğan adamdar biriniñ üstine biri şığıp – tüsip, tolqi teñselip twrğan siyaqtı körinedi. Keybireudiñ közi birese ekeu, birese törteu bolıp ketedi. Tipti tört qwlaqtı, üş mwrındıları da, jalpaq betterinde mwrın da, qwlaq ta joq, qatar – qatar tizilgen qisıq auızdıları da bar sekildi. Ara – twra aşulı ayqay – şulardan selk ete tüsemin de, közim bajırayıp, köringenge jautañdap, japaqtay qaraymın… biraq, mağan raqım qıluğa kimniñ batılı barsın?! Şını qaysı, jalğanı qaysı qaydan bileyin, eldiñ bäri de meni jep jibere jazdap, şatınap jarılıp ketkeli twrğan tärizdi. Tuğan – tuıs dostarımnıñ da öñi bir – aq künde bwzıla qalıptı. Bäri de qatulı, ana jaq bwrıştan eki mwrtı edireyip ağam da jwdırığın tüye ayğay saladı. Toptıñ orta twsınan inilerimniñ de jwdırığı körinedi. Endi bir twsta qara köleñkeleu bwrıştan küni keşege deyin moynıma asıla, “janım” dep sıbırlap jürgen qalıñdığımnıñ da appaq bilegi jarıq etip, kişkene jwdırıqtarı qayta – qayta sermelip qaladı. Qoyşı, äyteuir, köp jwdırıq samaladay qalıñ şoqpar siyaqtı basıma tönip – tönip ketedi.

-Tapsır!

-Söyle!

– Ayt şapşañ! – degen köp, şwğıl – şwğıl kelte bwyrıqtardıñ arasında «özdigiñnen tapsırsañ keñşilik etemiz” degen aqıl – tälimder de qwlağıma şalınıp qaladı.

Bwrın bwndaydı körmegen basım qayterimdi bilmey dal boldım. Ümitten ürey küşti, oylanıp – tolğanuğa, qabırğammen aqıldasayın deuge mwrsa joq, sasqalaqtay bastadım, Östip qısılıp twrğanda kenetten oyıma bir aqıl sap ete tüsti. Attıñ jalı tüyeniñ qomında onı da oylap taba qoyğam joq, eldiñ aytqan aqılın wğa qaldım. Özim de zerekpin – au, şirkin! Miıma qona ketti. Qwtıludıñ jolın oñay taptım. Bireu kelip bir tüyip ketken sayın basımdı tizeme tigizip şwlğıp twrıp maqwlday berdim:

-Dwrıs, bwlıq aydap jürgende tört künde segiz attı zorıqtırıp öltirdim…

-maqsatıñ ne?

-Sociyalizmdi audarmaqpın.

-Qırmannan topan äkele jatırmın dep eldi aldap, qwnan ögizime tört dağar bidaydı bir jolda teñdep äkeldim. Asıl qoşqar deysiz be? Dwrıs, qoy jayıp jürgende iirmek wşı şekesinen kirip baradı degen sıltaumen asıl qoşqardıñ müyizin kesip tastap öltirmek boldım. Ondağı maqsatım, iya, iya, tüp maqsatım, qoşqardıñ müyizin keskende me? Aytayın, aytayın, tüp maqsatım – kapitalizmdı qayta tirildiru.

-Odan basqa?

-…..

-Kimderdi öltirmek boldıñ?

-Jasırmay ayt!

-Aytayın , iya, aytayın, jasırayın dep twrğam joq, wmıtıp baradı ekem, kedey – kembağaldardı qırmaq boldım. Onıñ işinde me? Iya, atap aytayın, kedey – kembağaldar wyımınıñ bastığın öltirmek edim, josparımdı ma? Iya, qaytıp öltirmek bolğanımdı da tapsırayın. Tonımdı audarıp kiip, arıqtıñ işine jata qalayın dep oyladım. Bastıq qara jorğamen taipaltıp kele jatıp, özime tayay bergende “qwq” dep ornımnan wşıp türegelsem, atı ürkip jalt beredi de, ol omaqasa jığılğanda moynı üzilip öledi dep josparladım…

…Qoyşı, “fakt” äşkerleuşilerdiñ eşqaysısınıñ meseldesin qaytarğam joq, bärine maqwl bolıp, bärin de razı ettim. Meniñ är bir moyındamamnıñ soñınan jiın basqaruşı “Törağa” da elge estirte ayqaylap:

-Jazıp qoy, Salima brigadirdı qatın degen. Äyelder teñdigine qarsı. Özi moyındadı, üş ögizdiñ arqasın jauır qılğan.Wjımnıñ irge tasın qazbaq, “tauıqtıñ tüsine tarı kiredi” degen … Ulı maqsatpen aytqan. özi moyındadı, – dep meniñ qazaqşa aytqan sözimdi qazaqşağa «audarıp» sañqıldap twr.

Söytip birinşi keş ayaqtadı. Aqıldılığımnıñ arqasında köp qinalmay aman – esen üyime qayttım. Ädet boyınşa «joğaltayıq», «it basın şağayıq» degen qalıñ ayqaymen bizdi bwrın şığarıp jiberuşi edi. Üyge bärinen bwrın keldim. Qolım qaltıldap twrıp karesin şamdı tamızdım da, tögip – şaşa qwyıp alıp bir şını su jwttım. Tör aldındağı sırmaqqa endi otıra berip edim, esik aşıldı da, säl eñkişteu kelgen bir qara kempir kirip kele jattı. Qapelimde “äkau bwl kim?” dep tesireye qatıp qaldım. Kirgen adam şamğa tayağanda ğana bayqadım, öz şeşem siyaqtı, şoşıp qaldım. Meniñ şeşem äli tip – tik, onıñ üstine aşañ jüzdi, aqqwbalau adam edi. Közimdi uqalap jiberip qayta qaradım. öz şeşem eken. Qwday saqtasın, qap – qara bolıp tüwtigip ketipti. Tüsi adam şoşırlıq: Özim bala jasımnan qarap üyrengen qabağınıñ seldir qara tükteri tikireyip alğan, äli bolatı qaytpağan, alası az közderi şüñireyip, işine kirip ketipti… Oypıray jalğız künde ne degen jüdegen deseñşi?! Adam siqı qalmaptı. Öñinde qan – söl joq tünerip twr, qaytsin endi! Bauırındağı balapanın jündey tütip jatsa däti qalay şıdasın?! Söz joq, meni şırıldatıp, qinağan adamdarğa zığırdanı qaynap kelgen bolsa kerek. Ol bastabında ün qatpay, sileygen qalpı mağan tesile qarap twrdı da, kenet qatqıl dauıspen inilerime bwyrıq berdi:

-Esikti ilip qoy! Terezeni qımtañdar!

“qorlıqqa şıdamay tığılıp kelgen ğoy, esik – terezeni bekitip alıp, qazir – aq meni bassalıp, köz jasın köldeter kelip». Balajan köñili bos adam edi – au, qolımdı pışaq kesip ketkende de jılap jiberetin. Meni sabap ketken balalardı da erinbey jalıqpay qualap kep jüretin. Bıltır attan jığılıp ayağım sınğanda da botaday bozdap bir kün jılağan. Qazir de söyter. «qwday qaqtı ğoy bügin, aman – esen qwtıldıñ, äyteu, aqılıñnan aynalayın, qwlınım!» dep aymalar… “şirkin, osındayda anasınıñ keudesine twmsığın tığa, omırauınan iskey twrıp bir jılap alsa, kökirektegi dert, şer-şemen ıdırap, bir qunap, seyilip qaladı ğoy kisi” dep oylap közim jasaurap ta ketti. Mwnımdı sezdirmeyin dep kiimimdi şeşine bastadım. Üy işinde läm dep söylegen eşkim joq, kenet şeşemniñ dauısı sañq ete tüsti:

-Ey, beri kel! – dedi mağan bwyırıp. Eki bilegin sıbanıp alıptı. Oyımda tük joq, “meni bauırına basa egilip, şerin bir tarqatıp almaqşı ğoy” dep oylap jaqındap tayap bardım. Netken päruaysız, misızbın deseñşi. oyda joqta betime şapalaq şart ete tüsti. Közimniñ otı da jarq etti. Şeşemdi mwnday qarulı dep ömir boyı oylap ta körmegen bolatınmın. Tañerteñnen keşke deyin talay juan jwdırıqtıñ teperişin körsem de, däl osınday zildi tayaqtı sezbegen edim. Qwlağım dıñıldap, basım zeñip ketti. Közimniñ aldı qarauıtıp, üydiñ qabırğaları qisayıp, mätşaları jıljıp, sırğauıldarı şır aynalıp köşe bastadı. Qalay otıra qalğanımdı özim de bayqamay qaldım.

-Injıq! – dedi şeşem şaşımnan jwlqa qayta twrğızıp, basımdı kekjite şalqaytıp alıp, swrlana tönip twr. Oypıray, netken kärli edi! Şeşemnıñ öñi mwnşalıq suıq ekenin kim bilgen?! Mwnı öz közim körmey basqa bireuden estigen bolsam, senbegenim bılay twrsın, “şeşeme til tigizdiñ” dep töbelesuden de tayınbas edim. Aldımda omırtqasın opırıp, on ay köterip, tün wyqısın tört bölip, aq sütin emizgen anam emes, jürgi qarayıp alğan qas dwspanım twrğan siyaqtı. Qanın işine tartıp, bekinip alğan. Mwnan jaman, jas şağımda är küni bir neşe uaq qarala qojalaq betime, mañqası qwrğamaytın qaspaq tanauıma da jirenbey qwşırlana jabısa qalatın jwp – jwqa erinderin tistep, qanatıp jiberipti. Şuda jiptey sozılğan jip – jiñişke qızıl sızıq quday bolğan, bop – boz iegine qaray ap – ayqın sozılıp wzarıp baradı.

Men “oybay, apatay!” dep şoşına ayqaylap, ayağına orala ketpek bolıp, iile berip edim. Töbe qwyqamdı bürip twrğan qarulı qol tizemdi büktirmedi. Sonıñ arasında jağımnıñ tozañın şığara tağı da janıp – janıp jiberdi.

-Ez! –dedi kijinip, tistene ısıldap, – Men seni wl dep tuğam, erkek qoy qalja jegem… qaray gör mwnıñ janınıñ tättisin! Bir küngi bopsağa şıdamağan äljuäz, – dedi. Eki közi qantalap, qıp – qızıl bolıp, zahar şaşıp twr eken. Meni işip – jep bedireye qarap, äntek ayaldadı da, mañdayımnan keyin qaray nwqıp qalıp, jük jaqqa taman twra wmtıldı. Körpe – jastıq, kiiz – keşekti bir tarpıp qwlata salıp, sandıqtıñ qaqpağın saldır – swldır etkizdi de, lezde janıma qayta jetip keldi. Sonday şapşañ, qimılına köz ilespeydi.

-Büytip süyekke tañba tüsirgenşe, öz qolımmen bauızdap tastayın seni, – dedi jağamnan şap berip alqımımnan qılqındıra bürip twrıp. Alayıñqırap bara jatqan közime şeşemniñ qolındağı äkemniñ müyiz saptı kezdigi şalına ketti. äkem qaytıs bolğannan beri şeşem bwl kezdikti eşqaysımızğa wstatpaytın. Tek är jılı soğım basına ülkenderdi şaqırıp, qwran oqıtqızğanda ğana osı pışaqtı alıp şığıp, bizge et kesip beretin de, qaytadan tığıp qoyatın. Mine bwl kezdik endi mağan tönip twr. Pışaq wstağan qolı qızıl qanmen ant bergeli twğrğanday. Titteyde diril joq. Qas pen közdiñ arasında jarq ete tüskeli dap – dayın, oqtalıp twr. Osı kezde inilerim de şu ete tüsti. Wşıp türegelisip şeşemniñ qolına jarmastı. Wlarday şulap, jılap, jalınıp jür. Şeşem olarğa da ızalı közimen ata qarap:

-Şulama arı! Şığarma dıbıstarıñdı. Mına siyaqtı arsızdıq isteytin bolsañdar, bäriñdi de osı pışaqpen esip tastaymın, – dep jekirip toytarıp tastadı.

Oqtı közi äli meni atulı:

-Qay jerde öltirip jürsiñ segiz attı?

Mende ün joq.

-Müyizin keskenge qoşqar ölip, kapitalizm tirile me? Sociyalizmdi qoşqardıñ müyizi tirep twr ma eken? Ayt janıñnıñ barında! Halıq degendi, partiya degendi bilemisiñ sen, silimtir?

Mende tağı da ün joq.

-Kisi öltiretin qaraqşı attıñaldına jata qap öltire me eken? Poh, şikinniñ batırın – ay!

Mende äli dıbıs joq. Tilim buılıp, zauanım twtılıp qalğalı qay zaman?!

“tergeu” birtalayğa deyin sozılğanımen, meniñ qarısqan jağıma til kirgize alğan joq. Bağanağıday emes, esimdi jiya bastadım. Eşqanday jauap berudiñ qajeti joqtığın, özimniñ nege künäli ekenimdi de barandap añğarıp twrmın.

Kenet taqtay şarq ete qaldı. Şeşemniñ qolındağı kezdik üstelge kirş ete tüstı. Selk etip, şeginip qalğanımdı artınan bayqadım.

Şeşem meniñ janıma tebitip tağı da jetip keldi de, bilegimnen jwlqa tartıp, esikke qaray iterip jiberdi:

-Şıq üyden! Qazir bar da ayt ana basşılıq alqasındağılarğa. “qoyan jürek qorqaqpın, ezbin. Sol üşin ağat ayttım, ötirik edi” de. Suayttıqpen jan sauğalağanşa, şındıqtı aytıp şıñırauğa qwlasañ netti?! Osılay ölseñ men seniñ basıña mwnara ornatar edim. Bwyıram sağan bar şapşañ! äytpese men seni keşedi eken dep oylama! – dedi.

Ömiri şeşemniñ tilin bwrıp körmep edim. Onıñ üstine bağanadan özim de opıq jep, jerge kirip kete jazdap twrğam. Sülkinim tüse sülmireyip bosağadan attay berdim.

Men barğanda “belsendi toptağılar” äli taramaptı. Qwlaqtarına deyin qızarısıp, birdeñege talasıp jatır eken. Kirip bardım.

-Ne ğıp jürsiñ, ey, mwnda? – dep ajırañdadı bireui meni köre qalıp.

-Men qatelesippin. Jaña qorıqqanımnan ötirik moyındap edim, – dedim men bezek qağıp.

-ol – aq eken:

-Üy, mınau ne ottap twr?! – dep bes – altı adam orındarınan öre türegeldi. Jügirip janıma kelip qorşay qaldı. Közimdi şwqıp kijine bastadı. Tipti, azdap jwmarlap ta jiberdi.

-Kim üyretti bwnı sağan?

Meniñ közim terezege tüsti. Äynegi sınğan bos közden şeşem baspalap qarap twr eken. Arqalanıp kettim:

-Eşkimüyretken joq, – dedim qasqayıp. Onan arı ne dese de, sazarıp mılqau bolıp aldım. Qanşa kärlengenimen, tük şıqpaytınına közi jetti me , zerigip ümit üzdi me, joq älde özderiniñ de wyqısı keldi me, bilmeymin, äyteu, “körgilikti erteñ köresiñ!” dep zirkildep – zirkildep tañğa jaqın qoya berdi.

Eñsem köterilip, büginginiñ bäri wmıt bolıp, jeñileyip, erlenip qayttım. Jol üstinde bireu qolımnan wstay aldı. Közge türtkisiz qarañğı bolsa da, tani kettim. Jazbay tanıdım. Anamnıñ qolı. Meyırban anamnıñ qolı. Ip – ıstıq.

-Endi adam boldıñ, – dedi şeşem üyge kelgen soñ.

Jazdıñ küni bolsa da, şeşem bayqws toñıp, qalşıldap ketken eken. Aşumen köylekşeñ şığıp ketip otır ğoy. Meniñ tamağımdı berdi de, bük tüsip, oranıp jatıp qaldı. Men de köpke şeyin wyıqtay almadım. Şeşem de oyau jattı. Ne degeni belgisiz, anda – sanda kübirlep qoyadı. Bälkim, jazıqsız jaman wlı üşin Alladan tilek tilep, siınıp jatqan bolar?! Dwğakoy ana ğoy! Nemese mağan tañerteñ aytatın sözderin jattap jatqan şığar! YAki, älde qanday bir erlik şejiresin esine tüsirip, erşimine keltire almay kübirledi me eken?!…

Erteñinde tañerteñgi şay üstinde şeşem mağan:

-Aqımaq bolma, balam. Jas bolsañ da, er azamatsıñ. El ümiti özderiñde. Ezdikti qwday jauğa bersin. Ülken atañ da er kisi edi. Bir jolı jortuılğa barğanda, at jığılıp ortan jiligi opırılıp ketkende, Altay men Sauırdıñ arasına ayağın qanjığasına baylap kelip tañdırğan eken. Keyin qisıq bitipti. Basqa bir otaşını şaqırıp qayta saldırmaq boptı. Otaşı käri adam eken. “qarağım, qauqarım az, tört – bes jigit şaqır, äytpese, meni öltirip ketesiñ. Men seniñ bir seripkeniñnen qalam ba?” dep könbepti. “közimniñ tirisinde keudemdi jan balısına bastıra almaymın” depti atañ. Eki jağına eki qazıq qaqtırıp, eki qolımen sodan wstap, «qıbır etpeymin» dep sert beripti. Aytqanınday qaynasıp bitken süyekti qayta sındırıp, ornalastırıp tañıp bolğanşa, bılq etpegen eken. Artınan el tört qabattap tistegen kepeşin auzınan äreñ alğan kezde qasqa tisteri saudırap qosa tüsipti desedi ülkender. Oylaşıöziñ, atalarıñ osınday er bolğan. Erdiñ wrpağı ez bolsa, baqtıñ qaytqanı emey nemene?! Ülken apañ da mıqtı kisi eken. Äkeñdi jaugerşilik zamanda köş jönekey tuıptı da, belin şılauışımen buıp alıp, künşilik jolğa jüripti» dep añız etedi el. Bwrınğı batırlardan qalğan sarqıtsıñ. Tamaqqa toyıp al da, öziñe öziñ berik bol. Erdiñ erligi özgege körsetken küşinen ğana emes, özine istetken qayratınan da bilinedi. Wqtıñ ba? – dedi.

Bir täuiri sonan bastap üyimizde tätti – dämdiniñ bäri meniñ auzıma tosulı boldı. Şeşem bayqws özi tük işpese de mäz:

-Mine, jaraysıñ, jigit boldıñ! Er namısı degen düniedeginiñ bärinen de qımbat. Men bir oqımağan nadan adammın. Jüregimde jattalıp, süyegimde siñisti bolıp qalğan atalı söz ğoy bwl. Atalarıñ siyaqtı bügin de mıqtı bol, – deytin keşki arpalısqa attandırğalı jatıp qayta qadağalap.

Keyin de körgilikti köp kördim. Talay – talay tar, qısañ, şırğası köp, şım – şıtırıq şıñıraulardan öttim. Biraq, qanday qiın – qıstau kezde de ana ämirin wmıtqam joq. Auzım qanğa tolğan sätterde de, ana sütiniñ dämi birge ketip qalmasın dep işime jwttım. Aq süt qoy ol! Ar – namıs şwbatı emes pe?! Mağan när bergen sonıñ qwdireti!

El meni maqtağan sayın men anamdı sağınamın. Töbeme köterip, ayğa deyin alıp wşsam deymin. Ötelmegen borışım köp. Jwmırtqadan şayqalğan balapanmın ğoy … Samwrıq deytin alıp qara qws balapandarın sağınıp, zulap kele jatadı. Ekpininen dauıl twradı. Köz jasınan jañbır sirkireydi… Balapanın tiri körip şeksiz quanışqa bölenedi. Aqımaqtığına aşulanıp, temir tegeurinimen ayamay büredi… Aman bolsa dep tileydi… Ana ğoy! Meşkey ana!

 Altay qalası.

Jaqsılıq Sämitwlı

Pikir jazu

Please enter your comment!
Please enter your name here